Ибупрофен организмни саратондан ҳимоя қилишда самарали эканлиги аниқланди — янги тадқиқот
International Journal of Cancer (Халқаро саратон журнали) нашрида чоп этилган сўнгги тадқиқот натижаларига кўра, ибупрофен дори воситасини мунтазам қабул қилиш аёлларда эндометриум (бачадоннинг шиллиқ қавати) саратони ривожланиш хавфини камайтириши мумкин.
Тадқиқот АҚШнинг PLCO дастури доирасида ўтказилган бўлиб, унда 42 мингдан зиёд аёлларнинг 12 йил давомида соғлиғи кузатилган. Ушбу давр мобайнида эндометрия саратонининг 678 та ҳолати қайд этилган.
Маълумотларга кўра, ойига камида 30 та ибупрофен таблеткасини қабул қилган аёлларда эндометриум саратони хавфи ушбу дорини ойига тўрт мартадан кам истеъмол қилганларга қараганда 25 фоизга кам бўлган. Айниқса, таъсир юрак-қон томир касалликларига эга бўлган аёллар гуруҳида яққолроқ намоён бўлган — уларда саратон ривожланиш эҳтимоли деярли ярим баробарга камайган.
Шу билан бирга, ҳаракат механизми ўхшаш бўлишига қарамай, аспирин дориси на умумий, на алоҳида тоифаларда бачадон саратон хавфига сезиларли таъсир кўрсатмаган. Мутахассислар бу фарқ ибупрофеннинг яллиғланишга қарши таъсири ва эндометриум гормонал муҳитига таъсиридаги ўзига хосликлар билан боғлиқ бўлиши мумкинлигини таъкидламоқда.
Муаллифларнинг таъкидлашича, бу натижалар кузатувга асосланган, шунинг учун ибупрофенни саратон профилактикаси мақсадида ўзбошимчалик билан қабул қилиш мутлақо тавсия этилмайди. Ибупрофенни узоқ муддат юқори дозада қабул қилиш ошқозон яраси, ички қон кетиши, буйрак ва юрак шикастланишига олиб келиши мумкин. Шунингдек, бу дори антикоагулянтлар ва антидепрессантлар билан ўзаро таъсирга киришиб, уларнинг ножўя таъсирларини кучайтиради.
Шу билан бирга, олинган натижалар келгусида аёлларда онкологик хавфларни камайтиришга қаратилган хавфсиз ва самарали яллиғланишга қарши профилактик усулларни ишлаб чиқиш борасида янги илмий тадқиқотлар учун пойдевор яратиши мумкин.
- 23 Октябрь, 13:30
-
Батафсил
