Хитойда дунёдаги биринчи сунъий интеллект шифохонаси очилади
Пекиннинг Sinxua университети тўлиқ сунъий интеллект билан ишлайдиган дунёдаги биринчи шифохонага асос солди.
“Агент шифохонаси” дея номланган бу муассасада 14 нафар виртуал шифокор ва 4 нафар ҳамшира фаолият кўрсатади. Бу ҳақда Medium нашри хабар берди.
Виртуал тиббиёт ходимлари кунига 3 000 нафаргача беморга ташхис қўйиш, даволаш ва бошқариш имкониятига эга бўлиши кутилмоқда. Тизим бир неча кун ичида 10 минг ҳолатни кўриб чиқади — бу шифокорлар икки йилда бажарадиган иш. Бу, айниқса, мутахассис етишмайдиган ҳудудларда ас қотади.
Робот шифокорлар АҚШнинг тиббий лицензиялаш имтиҳонидан 93 фоиздан ортиқ аниқлик билан ўтишга муваффақ бўлишган. Улар аввалги тиббий сунъий интеллект тизимларидан фарқли ўлароқ, фақатгина тасвирларни таҳлил қилиб қолмай, бир нечта соҳаларда мутахассислик хизматини таклиф этади.
“Бу технология мавжуд тиббий сунъий интеллектдан тубдан фарқ қилади. Улар аввалги тиббий сунъий интеллект тизимларидан фарқли ўлароқ, нафақат тасвирларни таҳлил қилади, балки бир нечта йўналишда мутахассислик хизматини ҳам таклиф этади”, дейди лойиҳанинг етакчи тадқиқотчиси доктор Лихуа Чжан.
АҚШ тиббий лицензиялаш имтиҳонидан ўтказилганда, виртуал шифокорлар 93,06 фоиз аниқлик билан муваффақият қозонган. Бу кўплаб мамлакатлар тиббиёт битирувчилари учун ўртача ўтиш даражасидан юқори.
Беморларга ғамхўрлик қилишдан ташқари, бу касалхона тиббий таълим учун мисли кўрилмаган имкониятларни тақдим этади. Тиббиёт талабалари ушбу виртуал муҳитда малака ошириши мумкин бўлади. Бу уларга ҳақиқий беморларга ҳеч қандай хавф туғдирмасдан соҳасида ривожланишга ёрдам беради. Ушбу шифохона катта технологик ютуқ бўлса-да, ҳали оммага тақдим этилганича йўқ.
