Сўнгги йилда Россияда болалар учун онкосуғурта полисларига бўлган талаб кескин ошди — 2025 йилнинг биринчи ярмида 1 ёшдан 18 ёшгача бўлган болалар ва ўсмирлар орасида суғурта қилинганлар сони ўтган йилнинг худди шу даврига нисбатан 5 бараварга кўпайган.

Бу ҳақда "Росгосстрах" компаниясининг шахсий суғурта бўйича департаменти маълум қилган.

Мутасаддиларнинг қайд этишича, сўнгги йилларда саратон "ёшармоқда" — бу касаллик фақат қарияларники эмас, балки 50 ёшдан кичик инсонлар, ҳатто болалар ва ўсмирлар орасида ҳам тобора кўпроқ қайд этилмоқда. Жаҳонда ҳар йили 400 мингдан ортиқ болалар онкологияси ҳолатлари аниқланади. Баъзи ўсмалар жуда тез ўсиши туфайли, эрта ташхис ва ўз вақтида даволаш муваффақият калити ҳисобланади.

Бугунги кунда онкосуғурта полислари на фақат даволаниш харажатларини (8 миллион рублгача) қоплашни, балки ташхис қўйилганида бир марталик тўлов (200 минг рубль), шахсий врач-куратор кузатуви ва реабилитацияни ҳам ўз ичига олади. Агар даволаниш хорижий клиникаларда амалга оширилса, суғурта тўловлари 25 миллион рублгача етиши мумкин.

Ота-оналар болалар учун суғурта полисини, одатда, бутун оила учун тўплам сифатида сотиб олишмоқда. Бу полислар катталарникига нисбатан анча арзон: катталар учун ойлик тўлов 600–2000 рубль атрофида бўлса, болалар учун бу миқдор 300–600 рублни ташкил этади.

Анна Елфимова, docdeti клиникаси онколог шифокорининг таъкидлашича:
«Ҳозирги кунда ҳам шифокорлар, ҳам ота-оналарнинг онкологик касалликлар тўғрисидаги хабардорлиги ортган. Бу эса ташхисни эрта қўйиш ва даволаш натижаларини яхшилашга хизмат қилмоқда. Сўнгги йилларда болалар онкологиясида иммунотерапия, таргетли терапия ва ҳужайравий технологиялар сингари замонавий усуллар жорий этилмоқда. Улар даволаш самарадорлигини янада оширмоқда.»

Мутасаддилар таъкидлашича, вақтинчалик сарф қилинган суғурта тўлови бола ҳаётини сақлаб қолишда ҳал қилувчи омилга айланиши мумкин.