COVID-19 организмда аллақачон мавжуд бўлган «уйқудаги» вирусларни «уйғотиши» мумкин. Уларнинг қайта фаоллашиши касалликнинг оғирроқ кечиши ва узоқ давом этувчи COVIDнинг айрим белгилари билан боғлиқ, деган хулосага келди Техас университети тадқиқотчилари.

Тадқиқот натижалари Nature журналида эълон қилинган. Олимлар 2021 йил ўртасигача COVID-19нинг оғир шакли билан касалхонага ётқизилган 1154 нафар беморни кузатган. Бир йил давомида улар қон намуналари ва бурундан олинган суртмаларни таҳлил қилиб, SARS-CoV-2 инфекцияси вақтида қайси вируслар қайта фаоллашганини аниқлашга ҳаракат қилган.

Маълум бўлишича, беморларнинг деярли ярмида аввал организмда «уйқудаги» ҳолатда бўлган камида битта вирус қайта фаоллашган. Энг кўп ҳолларда Эпштейн — Барр вируси (EBV), герпес ва анелловирусларни аниқлаган.

Таъкидланишича, COVID-19 келтириб чиқарадиган кучли иммун инқирози организмнинг ички ҳимоя тизимини заифлаштиради. Оқибатда сурункали чарчоқ, асаб тизимининг шикастланиши ҳамда узоқ давом этувчи жисмоний ногиронлик хавфи кескин ортади.

Шифокорлар ушбу янги кашфиёт COVID асоратларидан азият чекаётган миллионлаб беморларни самарали даволаш, улар организмидаги яширин инфекцияларни даволашда муҳим қадам демоқда.

Энди олимлар бундай вирусларнинг қайта фаоллашишини жиловлайдиган вирусларга қарши препаратлар COVID-19нинг узоқ муддатли асоратлари ривожланиш хавфини камайтира оладими-йўқми, шуни текширишни режалаштирмоқда.