Райҳон экстракти болаларда кариеснинг олдини олишда фторга муқобил бўлиши мумкин. Тадқиқотчилар шундай хулосага келишди, иш натижалари International Journal of Clinical Pediatric Dentistry (IJCPD) журналида чоп этилган.

Тадқиқотда 6 ёшдан 8 ёшгача бўлган 40 нафар бола иштирок этди. Биринчи гуруҳдаги болалар тишига райҳон асосида тайёрланган стоматологик лак суртилди, иккинчи гуруҳга эса стандарт фтор сақловчи лак қўлланилди. Муолажа тўрт ой давомида бир неча марта такрорланди, шундан сўнг кариеснинг бошланғич белгилари ва Streptococcus mutans бактериялари миқдори баҳоланди.

Иккала маҳсулот ҳам кариес фаоллигини камайтириши аниқланди, аммо фторид эмални тиклаш ва зарарланган жойлар сонини камайтиришда янада кучлироқ самара кўрсатган. Шу билан бирга, райҳон асосидаги лак кариесни келтириб чиқарадиган бактерияларни бостиришда самаралироқ бўлди, бу унинг кучли антибактериал хусусиятларидан далолат беради.

Муаллифлар таъкидлашича, райҳон таркибида кальций ва фосфор бирикмалари мавжуд бўлиб, улар тиш эмалини реминерализация қилишга ёрдам беради. Шунингдек, у табиий антимикроб фаолликка ҳам эга. Энг муҳими, болаларда ҳеч қандай ножўя таъсирлар кузатилмаган, бу эса бундай воситаларни хавфсиз алтернатив сифатида кўриш мумкинлигини англатади.