Rayhon ekstrakti bolalarda kariyesning oldini olishda ftorga muqobil bo‘lishi mumkin. Tadqiqotchilar shunday xulosaga kelishdi, ish natijalari International Journal of Clinical Pediatric Dentistry (IJCPD) jurnalida chop etilgan.

Tadqiqotda 6 yoshdan 8 yoshgacha bo‘lgan 40 nafar bola ishtirok etdi. Birinchi guruhdagi bolalar tishiga rayhon asosida tayyorlangan stomatologik lak surtildi, ikkinchi guruhga esa standart ftor saqlovchi lak qo‘llanildi. Muolaja to‘rt oy davomida bir necha marta takrorlandi, shundan so‘ng kariyesning boshlang‘ich belgilari va Streptococcus mutans bakteriyalari miqdori baholandi.

Ikkala mahsulot ham kariyes faolligini kamaytirishi aniqlandi, ammo ftorid emalni tiklash va zararlangan joylar sonini kamaytirishda yanada kuchliroq samara ko‘rsatgan. Shu bilan birga, rayhon asosidagi lak kariyesni keltirib chiqaradigan bakteriyalarni bostirishda samaraliroq bo‘ldi, bu uning kuchli antibakterial xususiyatlaridan dalolat beradi.

Mualliflar ta’kidlashicha, rayhon tarkibida kalsiy va fosfor birikmalari mavjud bo‘lib, ular tish emalini remineralizatsiya qilishga yordam beradi. Shuningdek, u tabiiy antimikrob faollikka ham ega. Eng muhimi, bolalarda hech qanday nojo‘ya ta’sirlar kuzatilmagan, bu esa bunday vositalarni xavfsiz alternativ sifatida ko‘rish mumkinligini anglatadi.