Дунёда энг кенг тарқалган дори воситаларидан бири бўлган аспирин хавфли ўсма) касалликларини даволашда кутилмаган даражада кучли таъсирга эга экани аниқланди.

The New England Journal of Medicine журналида чоп этилган янги тадқиқот шуни кўрсатдики: йўғон ичак (колоректал) саратони ва маълум генетик ўзгаришлар билан оғриган беморларда операциядан кейин препаратнинг паст дозасини (160 миллиграмм) ҳар куни қабул қилиш касалликнинг қайталаниш хавфини 55 фоизга камайтирди.

Тадқиқот ALASCCA номли клиник синов асосида олиб борилган бўлиб, унда Швеция, Норвегия, Дания ва Финляндиядаги 33 та шифохонадан 3,5 мингдан ортиқ беморлар иштирок этган. Олимлар эса диққатни PIK3 сигнал узатиш йўли генларида мутация мавжуд бўлган ўсмаларга эга беморлар гуруҳига қаратган. Бундай генетик ўзгаришлар йўғон ичак саратонига чалинган беморларнинг тахминан 40 фоизида учрайди. Айнан шу гуруҳда аспирин ўсмаларида мутация бўлмаганларга нисбатан сезиларли ҳимоя таъсирини кўрсатган.

Тадқиқотчиларнинг фикрига кўра, аспириннинг таъсир механизми кўп қиррали: яллиғланишни камайтиради, тромбоцитлар фаолиятини блоклайди ва ўсимта ўсиши учун қулай муҳитни йўқотади. Бу беморнинг генетик хусусиятларини ҳисобга олган ҳолда шахсийлаштирилган терапияда айниқса қимматлидир.

Муаллифлар ушбу натижалар глобал аҳамиятга эга бўлиши мумкинлигини алоҳида таъкидлашмоқда. Аспирин деярли ҳар қандай мамлакатда мавжуд бўлиб, замонавий хавфли ўсмага қарши препаратларга нисбатан анча арзон туради. Бу эса уни йўғон ичак чаратонини даволаш бўйича халқаро клиник тавсияномаларга киритиш имкониятини яратади.