Копенгаген университети олимлари болаликдаги кариес ва оғир милк касалликлари катта бўлганда инфаркт, инсульт ва ишемик юрак касалликлари хавфининг ошиши билан боғлиқ эканини аниқлашди.

Тадқиқот натижалари International Journal of Cardiology журналда эълон қилинди. Тадқиқот 1963–1972 йиллар оралиғида Данияда туғилган 568 778 киши маълумотларига асосланган. Олимлар Миллий болалар стоматологияси реестридаги маълумотларни Миллий беморлар регистридаги юрак-қон томир касалликлари ёзувлари билан таққослашган.

Таҳлил натижалари шуни кўрсатдики: болаликда бир неча марта кариес билан оғриган одамларда катта ёшда юрак-қон томир касалликлари хавфи тиш муаммоси кам бўлганларга нисбатан 45% га юқори бўлган.

Оғир гингивитни бошдан кечирганларда эса хавф 41% га ошган. Шунингдек, болаликда оғиз бўшлиғи ҳолати қанчалик ёмон бўлса, катта ёшда юрак касалликлари ривожланиш эҳтимоли шунчалик юқори бўлиши аниқланган.

Муаллифлар таъкидлашича, бу ерда гап тўғридан-тўғри сабаб-оқибат боғлиқлиги исботи ҳақида эмас, балки статистик боғлиқлик ҳақида кетмоқда.  Мумкин бўлган механизмлардан бири — сурункали яллиғланиш. Тадқиқотчилар фикрича, болаликда кариес ва милк касалликлари пайтида юзага келадиган яллиғланиш жараёнлари кейинчалик иммун тизими фаолиятига таъсир қилиши ва атеросклероз ривожланишига туртки бериши мумкин.

Олинган маълумотлар пародонтит ва юрак-қон томир касалликлари ўртасидаги боғлиқликни кўрсатган аввалги тадқиқотлар натижаларига мос келади.

Олимлар фикрича, бу хулосалар болаликдан бошлаб стоматологик муаммоларнинг олдини олиш муҳим эканини кўрсатади. Бу эса узоқ муддат юрак-қон томир саломатлигини сақлашда муҳим омил бўлиши мумкин.