Ультра қайта ишланган маҳсулотларни (UPF) истеъмол қилиш йўғон ичакдаги эрта саратонгача бўлган ўзгаришлар хавфини сезиларли даражада ошириши мумкин.

Массачусетс Генерал Бригам тадқиқотчилари қарийб 30 минг аёл маълумотларини таҳлил қилиб, UPF ни энг кўп истеъмол қилганларда аденомалар - йўғон ичак саратонининг прекурсорлари ривожланиш эҳтимоли 45 фоизга юқори эканлигини аниқлади. Тадқиқот натижалари JAMA Oncology журналда эълон қилинди.

Тадқиқотда Nurses’ Health Study II маълумотларидан фойдаланилди — бу йирик лойиҳа доирасида аёллар 24 йил давомида мунтазам эндоскопиядан ўтганр ва озиқ-овқат истеъмоли ҳақида батафсил сўровномалар тўлдирган. Ўртача ҳисобда иштирокчилар кунлик калориянинг тахминан 35 фоизини ультрақайта ишланган маҳсулотлардан олишган, аммо энг юқори истеъмол гуруҳида бу улуш бир неча маротаба юқори бўлган. Ана шу гуруҳда эрта йўғон ичак саратони билан боғлиқ аденомалар кўпроқ учраган.

Бу боғлиқлик семизлик, диабет ва клетчатка кам истеъмоли каби бошқа хавф омиллари ҳисобга олинганидан сўнг ҳам сақланган.

Муаллифларнинг таъкидлашича, эрта босқичда колоректал саратоннинг ўсишини фақат озиқ-овқат билан изоҳлаш мумкин эмас, аммо рационда ультра қайта ишланган маҳсулотлар улушини камайтириш — хавфни пасайтириш учун потенциал муҳим қадам ҳисобланади.

Ҳозирда жамоа касалликнинг бошқа мумкин бўлган қўзғатувчи омилларини ўрганишда давом этмоқда ва ультра қайта ишланган озиқ-овқат маҳсулотларининг аниқроқ таснифларини ишлаб чиқмоқда.