Бугун Оммавий ахборот воситалари учун контент тайёрлаш марказида Наркотик ва ўқотар қуролларни назорат қилиш Агентлиги, ССВ, ДХХ, Божхона қўмитаси, Ўзбекистон маҳаллалари уюшмаси мутасаддилари иштирокида ""Гиёҳвандликка қарши кураш: республикадаги вазият, кўрилаётган чоралар ва янги стратегиялар" мавзусида матбуот анжумани бўлиб ўтди.

Қайд этилишича, сўнгги 5 йилда Ўзбекистонда наркожиноятлар сони 2 бараварга, ноқонуний муомаладан олинган наркотиклар мусодараси 67 фоизга ошган бўлса, синтетик гиёҳвандлик воситалари мусодараси 80 бараварга кескин кўпайган.

2024 йилда ҳуқуқ-тартибот идораларининг саъй-ҳаракатлари натижасида 5 та яширин нарколабораториялар фаолиятига чек қўйилган бўлса, жорий йилнинг 10 ойида ушбу кўрсаткич 12 тани ташкил этган.

Жорий йилнинг 10 ойида республикада 12 848 та наркожиноят аниқланиб, 2 тн 761 кг наркотик, психотроп ва кучли таъсир қилувчи моддаларнинг ноқонуний муомаласига чек қўйилган ҳамда истеъмолга чиқиб кетишининг олди олинган.

Мазкур таҳдидларни бартараф этиш ҳамда “Гиёҳвандлик ва наркожиноятларнинг барвақт олдини олиш ҳамда уларга қарши курашиш бўйича 2025-2026 йилларга мўлжалланган комплекс амалий ҳаракатлар миллий дастури” ижросини таъминлаш мақсадида гиёҳвандликни олдини олиш ва уюшган жиноятчиликка қарши курашиш бўйича тадбирлар режаси ишлаб чиқилди.

Матбуот анжуманида режада белгиланган муҳим йўналишлар юзасидан давлат идоралари ва масъул ташкилотларнинг вазифалари баён этилди.

Ушбу режа хавф гуруҳидаги ўсмирларни барвақт аниқлаш чораларини кучайтириш, таълим муассасалари ва оилаларда профилактикани мустаҳкамлаш, тарғибот-ташвиқот ишларини такомиллаштириш, гиёҳванд моддалар тарқатишнинг янги усуллари ва схемаларини, шунингдек гиёҳвандлик ва уюшган жиноятчиликка қарши курашда идоралараро ҳамкорлик самарадорлигини оширишга йўналтирилган.

 Унда барқарор профилактика медиамуҳитини яратиш, таҳдидларни аниқлаш бўйича рақамли технологияларни ривожлантириш, маҳалла, ННТ ва фуқаролик жамиятининг иштирокини кенгайтириш, шунингдек уюшган гуруҳлар ва гиёҳвандлик бизнесининг “қуйи бўғини” фаолиятини қатъий ва мақсадли тарзда чеклаш бўйича чора-тадбирлар белгиланган.