АҚШ Озиқ-овқат ва фармацевтика идораси (ФДА) сурункали вирусли гепатит D (HDV) ни даволаш учун мўлжалланган Hepcludex препаратини қўллашга рухсат берди. Препарат Gilead Sciences томонидан ишлаб чиқилган.

Гепатит D вирусли гепатитнинг энг оғир шаклларидан бири ҳисобланади ва у фақат гепатит B вируси билан зарарланган одамларда ривожланади. Касаллик жигар тўқималари фибрози, жигар саратони, жигар етишмовчилиги ва ҳатто ўлимга олиб келиши мумкин.

Препаратни тасдиқлаш қарори III босқич клиник тадқиқот натижаларига асосланган. Унга кўра, 48 ҳафта давомида дори қабул қилган беморларнинг 48 фоизида аҳвол сезиларли яхшиланган. Даволанмаган беморларда эса бу кўрсаткич атиги 2 фоизни ташкил этган. Шунингдек, узоқ муддатли қўллаш давомида вирус юкламаси аниқланмайдиган даражагача пасайгани қайд этилган.

Кунига бир марта инъекция кўринишида қўлланиладиган препарат вируснинг жигар ҳужайраларига киришини блоклаш орқали инфекция тарқалишини секинлаштиради.

Шу билан бирга, дори йўриқномасида FDAнинг жиддий огоҳлантириши ҳам келтирилган. Унга кўра, даволашни тўхтатиш гепатит D ва гепатит Bнинг ҳаёт учун хавфли кучайишига сабаб бўлиши мумкин. Айниқса, жигар фибрози ривожланган беморларда бу хавф юқори ҳисобланади.