AQSH Oziq-ovqat va farmatsevtika idorasi (FDA) surunkali virusli gepatit D (HDV) ni davolash uchun moʻljallangan Hepcludex preparatini qoʻllashga ruxsat berdi. Preparat Gilead Sciyences tomonidan ishlab chiqilgan.

Gepatit D virusli gepatitning eng ogʻir shakllaridan biri hisoblanadi va u faqat gepatit B virusi bilan zararlangan odamlarda rivojlanadi. Kasallik jigar toʻqimalari fibrozi, jigar saratoni, jigar yetishmovchiligi va hatto oʻlimga olib kelishi mumkin.

Preparatni tasdiqlash qarori III bosqich klinik tadqiqot natijalariga asoslangan. Unga koʻra, 48 hafta davomida dori qabul qilgan bemorlarning 48 foizida ahvol sezilarli yaxshilangan. Davolanmagan bemorlarda esa bu koʻrsatkich atigi 2 foizni tashkil etgan. Shuningdek, uzoq muddatli qoʻllash davomida virus yuklamasi aniqlanmaydigan darajagacha pasaygani qayd etilgan.

Kuniga bir marta inyeksiya koʻrinishida qoʻllaniladigan preparat virusning jigar hujayralariga kirishini bloklash orqali infeksiya tarqalishini sekinlashtiradi.

Shu bilan birga, dori yoʻriqnomasida FDAning jiddiy ogohlantirishi ham keltirilgan. Unga koʻra, davolashni toʻxtatish gepatit D va gepatit Bning hayot uchun xavfli kuchayishiga sabab boʻlishi mumkin. Ayniqsa, jigar fibrozi rivojlangan bemorlarda bu xavf yuqori hisoblanadi.