JSST — Jahon sogʻliqni saqlash tashkiloti tomonidan joriy yilning 13-oktyabr kuni eʼlon qilingan tibbiy mahsulot boʻyicha ogohlantirishda (Medical Product Alert N°5/2025: Substandard (contaminated) oral liquid medicines) Hindistonda ishlab chiqarilgan ogʻiz orqali qabul qilinadigan uchta sifatsiz (ifloslangan) dori vositasi haqida maʼlumot berildi.

Xususan, Sresan Pharmaceutical, Rednex Pharmaceuticals va Shape Pharma korxonalari tomonidan ishlab chiqarilgan “COLDRIF”, “Respifresh TR” va “ReLife” nomli yoʻtal siroplarining ayrim seriyalarida inson salomatligi uchun xavfli modda — dietilenglikol (DEG) aniqlangani qayd etilgan. Mazkur dori vositalarini qabul qilish natijasida Hindistonning ayrim hududlarida bolalar oʻlimi holatlari sodir boʻlgani maʼlum qilingan.

Oʻzbekiston Respublikasi Sogʻliqni saqlash vazirligi huzuridagi Farmatsevtika mahsulotlari xavfsizligi markazi yuqoridagi holat yuzasidan quyidagilarni maʼlum qildi:

Oʻzbekiston Respublikasining 2014-yil 4-yanvardagi “Dori vositalari va farmatsevtika faoliyati toʻgʻrisida”gi OʻRQ-399-son Qonuniga muvofiq, yurtimiz hududida dori vositalari, tibbiy buyumlar va tibbiy texnikalar tibbiyot amaliyotida qoʻllanilishi uchun ular davlat roʻyxatidan oʻtkazilgandan soʻnggina ruxsat etiladi. Shuningdek, ushbu dori vositalarini faqat qoʻllanilishiga doir yoʻriqnoma (instruksiya) talablariga muvofiq qabul qilinishi belgilangan.

Yuqoridagilardan kelib chiqib, Hindistonning Sresan Pharmaceutical, Rednex Pharmaceuticals va Shape Pharma kompaniyalari tomonidan ishlab chiqarilgan birorta dori vositasi, jumladan “COLDRIF”, “Respifresh TR” va “ReLife” preparatlari Oʻzbekistonda davlat roʻyxatidan oʻtkazilmaganligini bildiramiz.

Shuningdek, amaldagi qonunchilikka muvofiq, davlat roʻyxatidan oʻtgan va yurtimizga kirib kelayotgan dori vositalarining har bir seriyasi akkreditatsiyadan oʻtgan sinov laboratoriyalarida sinovlardan oʻtkazilib, ijobiy natijalariga asoslangan holda sertifikatlashtiriladi. Sertifikatlashtirilmagan dori vositalarini bojxona hududidan olib chiqilishiga va realizatsiya qilinishiga yoʻl qoʻyilmaydi.

Eslatib oʻtamiz, Farmatsevtika mahsulotlari xavfsizligi markazi direktorining 2024-yil 8-iyuldagi “Dori vositalarining etilenglikol va diyetilenglikol bilan kontaminatsiyalanishiga oid noxush holatlarni oldini olish toʻgʻrisida”gi 193-son buyrugʻiga muvofiq, yurtimizga import qilinayotgan glitserin, propilenglikol, polietilenglikol, sorbitol eritmasi, maltitol eritmasi, gidrogenlangan kraxmal gidrolizati va boshqa yuqori xavfga ega boʻlgan yordamchi moddalar saqlovchi ichga qabul qilishga moʻljallangan sirop shaklidagi preparatlarning tarkibida etilenglikol va dietilenglikollar kabi yot moddalarning mavjudligini farmakopeya talablari asosida majburiy ravishda tekshirish amaliyoti joriy etilgan.

Bu orqali Oʻzbekistonda dori vositalari xavfsizligini taʼminlash, aholini salomatligiga tahdid solishi mumkin boʻlgan holatlarning oldini olish hamda shunga oʻxshash noxush vaziyatlar takrorlanishini barvaqt profilaktika qilish boʻyicha aniq mexanizmlar yoʻlga qoʻyilgan, deyiladi xabarda.