Yaponiya Iqtisodiy va ijtimoiy rivojlanish dasturi doirasida O‘zbekistonga 14 ta qon markazi va uchta qon quyish stansiyasi uchun 2,3 mln dollarlik yangi uskunalar yetkazib beradi. Bu ixtiyoriy donorlardan tayyorlangan qon mahsulotlari ulushini oshirishi va tibbiy xizmatlar sifatini yaxshilashi kutilmoqda.

17-dekabr kuni O‘zbekiston sog‘liqni saqlash vaziri Asilbek Xudayarov va Yaponiyaning O‘zbekistondagi muvaqqat ishlar vakili Nakamura Shinichiro 360 mln iyena (2,3 mln dollardan ortiq) qiymatidagi Iqtisodiy va ijtimoiy rivojlanish dasturi bo‘yicha almashinuv notalarini imzoladi. Bu haqda Yaponiya elchixonasiga tayanib Gazeta nashri ma’lum qildi.

Dastur doirasida O‘zbekiston bo‘ylab 14 ta mintaqaviy qon markazlari, shuningdek, milliy klinikalardagi uchta qon quyish stansiyalari qonni saqlash va tashish uchun zamonaviy uskunalar bilan jihozlanadi.

“Loyihaning amalga oshirilishi mamlakatning donor qoniga bo‘lgan ortib borayotgan ehtiyojini qondirishga va ixtiyoriy donorlik orqali olingan qondan ishlab chiqarilgan preparatlar ulushini oshirishga yordam beradi”, — deb ta’kidladi elchixona.

Dastur Yaponiya hukumatining grant yordami doirasida amalga oshiriladi.

Diplomatik missiya yaqinda Tokioda bo‘lib o‘tgan birinchi “Markaziy Osiyo — Yaponiya” sammitida sog‘liqni saqlash va tibbiy xizmatlar hamkorlikning ustuvor yo‘nalishi sifatida belgilanganini ta’kidladi. “Yaponiya hukumati O‘zbekistonda yuqori sifatli tibbiy xizmatlardan foydalanishni yaxshilashni davom ettirish niyatida”, — deb qo‘shimcha qildi elchixona.