Yoshlar orasida miokard infarkti koʻpayib borayotganining sababi aytildi
Ilgari miokard infarkti asosan 50-60 yoshdan oshgan kishilarda kuzatilgan boʻlsa, endilikda 30-40 yoshlilar, hatto 20 yoshdan oshgan yigit-qizlarda ham uchrayapti.
Respublika ixtisoslashtirilgan kardiologiya ilmiy-amaliy tibbiyot markazi direktori, tibbiyot fanlari doktori Xurshid Fozilov buning asosiy sabablari, keltirib chiqaruvchi omillar, amal qilish kerak boʻlgan qoidalar haqida soʻz ochdi.
Unga koʻra, miokard infarkti yurak mushagining maʼlum bir qismiga qon yetib bormagani sababli oʻsha toʻqimaning nobud boʻlishi hisoblanadi. Bunga odatda qon tomirlarda toʻsiq paydo boʻlishi, xolesterin yigʻilishi yoki tromb shakllanishi sabab boʻladi. Bu holat yurak yetkazib beradigan qon oqimini keskin kamaytiradi va xavfli asoratlarga olib kelishi mumkin.
“Yoshlarda infarktning asosiy sabablari haqida gapiradigan boʻlsak, avvalo, notoʻgʻri ovqatlanish va semizlik ham sabab boʻlmoqda. Afsuski, bugun aksariyat yoshlar fast-fud, yogʻli va qovurilgan taomlar, gazli ichimliklar va shakar miqdori yuqori boʻlgan mahsulotlarni koʻp isteʼmol qilayotganini inkor etib boʻlmaydi. Bu esa ortiqcha vaznga, qon bosimi oshishiga va qon tomirlarda ateroskleroz paydo boʻlishiga sabab boʻlmoqda”, deydi mutaxassis .
Bildirilishicha, harakatsizlik (gipodinamiya) ham bu kasallikni chaqirmoqda. Shuningdek, kompyuter, smartfon va boshqa gadjetlar yoshlarni biroz dangasa qilib qoʻygan. Sport bilan shugʻullanmaslik, uzoq vaqt bir joyda oʻtirib ishlash yoki oʻqish qon aylanishiga salbiy taʼsir koʻrsatadi.
Yana bir faktor sifatida yoshlar orasida bugun doimiy stress bilan muammolar ham yoʻq emas. Doimiy zoʻriqish, asabiylik organizmda adrenalin va kortizol miqdorini oshiradi, bu esa yurakni zoʻriqtirib, infarkt xavfini kuchaytiradi.
Tamaki va alkogol isteʼmoli ham yoshlarda bu kasallikning erta uygʻonishiga olib kelayotgan omillardan biri. Negaki, sigaret tarkibidagi nikotin va boshqa zararli moddalar qon tomirlarini toraytiradi. Tabiiyki, bu yurakka qon yetib borishini qiyinlashtiradi. Shuningdek, spirtli ichimliklar ham qon bosimi oshishiga va yurak ritmining buzilishiga sabab boʻladi.
Bu kasallikning oldini olish uchun jismoniy faollik, toʻgʻri ovqatlanish, zararli odatlardan voz kechish talab etiladi.
