Дорихонада сотиладиган ҳуснбузарга қарши машҳур крем таркибидан саратон касаллигини келтириб чиқарувчи модда топилди
Машҳур La Roche-Posay ҳуснбузарга қарши крем таркибида рухсат этилган меъёрдан ортиқча хавфли бензол моддаси борлиги аниқланди.
Бензолнинг кўп миқдори лейкемия ва бошқа оғир қон касалликларини келтириб чиқариши мумкин. Ҳозирда косметика воситаси зудлик билан чакана савдодан олиб ташлаш чоралари кўрилмоқда.
Крем таркибидаги бензол қаердан пайдо бўлган?
La Roche-Posay брендига эгалик қилувчи L'oreal компанияси заҳарли модда излари Effaclar Duo юз кремининг фақат битта партиясида топилганини маълум қилди. Шунга қарамай, француз ишлаб чиқарувчиси сотувчиларда мавжуд бўлган барча заҳираларни чакана савдодан бутунлай қайтариб олишга қарор қилди. Компаниянинг маълум қилишича, энди кремни фақатгина, ўтган йилдан бери ишлаб чиқарилаётган формуласи ўзгартирилгандан кейингина сотиб олиш мумкин бўлади.
Ҳозирда кремнинг асосий таркибий қисми бензоил пероксид бўлиб, у бактерияларни йўқ қилади ва шу орқали ҳуснбузарлар ва яллиғланишга қарши курашади. Лекин ташқи муҳитнинг маълум шароитларида, масалан, қиздирилганда зарарсиз модда бензолга - тамаки тутуни ва бензинда бўладиган заҳарли моддага айланади. Aгар у организмга кўп миқдорда тушса, лейкемия ва ўлимга олиб келиши мумкин.
Халқаро саратонни ўрганиш агентлиги бензолни 1-гуруҳ канцерогенлариқаторига киритади. Бензолнинг таъсири ўткир лимфолейкоз, сурункали лимфолейкоз (СЛЛ), кўп сонли миелома ва Хожкин бўлмаган лимфома билан боғлиқ.
Бу модда аллақачон бошқа ўнлаб брендларнинг маҳсулотларидан ҳам топилган.
L'oreal заҳарли косметикани бозордан зудлик билан олиб ташлашга мажбур бўлган биринчи косметика компанияси эмас. 2021-йилда Johnson & Johnson бешта номдаги қуёшдан ҳимоя воситаларида бензол топилганидан кейин худди шундай йўл тутган. 2022-йилда Банана Боат қуруқ шампунлар партиясини қайтариб олган, унда ҳам бензол сабабчи бўлганди.
