Жазирама иссиқнинг иммунитет ва касалликларга таъсири ўрганилди
Ирвиндаги Калифорния университети олимлари кучли жазирама иссиқлик кексаларнинг иммун тизими ва ичак фаолиятини сезиларли даражада заифлаштиришини аниқладилар. Тадқиқот натижалари Science of the Total Environment журналида эълон қилинди.
Мутахассислар гуруҳи турли ёшдаги сичқонлар устида тажриба ўтказиб, уларга ҳозирги иқлим шароитига хос бўлган ҳарорат таъсирини ўргандилар. Ёш сичқонлар билан солиштирганда каттароқ сичқонларда ичак тўсиғининг жиддий шикастланиши, тизимли яллиғланиш, иммунитет тизимининг бузилиши, шунингдек, ичакда антибиотикларга чидамли бактерияларнинг кўпроқ ўсиши кузатилди.
Олимлар илк бор жазирама иссиқ стреси ва ичак саломатлигининг ёмонлашуви ўртасида бевосита боғлиқлик борлигини аниқлашли. Бу эса оғир инфекциялар хавфини ошириши маълум бўлди. Шу билан бирга, ёши катта сичқонларда Roseburia intestinalis пробиотиги билан даволаш муолажаси ўтказилганда, уларнинг иммунитети тикланди ва инфекция аломатлари камайди.
Тадқиқот натижалари глобал исиш ва тез-тез кузатиладиган иссиқлик тўлқинлари шароитида, айниқса кексаларда, иммунитет барқарорлигини ошириш учун ичак саломатлигини қўллаб-қувватлаш муҳимлигини кўрсатмоқда.
