Tadqiqotchilar birinchi marta quruq ko‘z belgilari yoshlarning aksariyatida kuzatilishini isbotladi - 18 yoshdan 25 yoshgacha bo‘lgan tadqiqot ishtirokchilarining 90 foizida kasallikning kamida bitta belgisi kuzatilgan.

Yarmidan ko‘pi — 56 foizi allaqachon to‘liq quruq ko‘z sindromidan aziyat chekkan, 50 foizi esa ko‘z yoshi plyonkasining himoya qatlamini ishlab chiqarish uchun mas’ul bo‘lgan meibomiya bezlarining kamida to‘rtdan bir qismini yo‘qotgan. Maqola The Ocular Surface jurnalida chop etilgan.

Quruq ko‘z sindromi tanada yetarlicha ko‘z yoshlari paydo bo‘lmaganda yoki ularning tarkibi buzilganda rivojlanadi. Natijada qichishish, achishish, ko‘zning qizarishi, yorug‘likdan qo‘rqish va ko‘rishning xiralashishi yuzaga keladi. Kontakt linzalari taqib yuradiganlar va ko‘p vaqtini ekranlar oldida o‘tkazadiganlar xavf guruhiga kiradi. Tadqiqot ishtirokchilari ekranlardan kuniga o‘rtacha sakkiz soat foydalanishgan.

Tadqiqotchilar oradan bir yil o‘tib ishtirokchilarni yana tekshirishdi va ularning muhim qismida simptomlarning rivojlanishini qayd etishdi. Mualliflarning ta’kidlashicha, kasallikning bunday erta rivojlanishi erta tashxis qo‘yish va oldini olish zarurligini ko‘rsatadi. Ayniqsa, yoshlarga ko‘zlarini himoya qilishni o‘rgatish – kompyuterda ishlayotganda tanaffuslar qilish, ko‘z mashqlarini bajarish, suvsizlanishdan himoyalanish va yetarlicha uxlashni o‘rgatish zarur. Omega-3 yog‘ kislotalariga boy parhez ham xavfni kamaytirishi mumkin.

Olimlar kelgusi tadqiqotlarda olimlar sindromning rivojlanishi va ovqatlanishning ko‘z holatiga ta’sirini ko‘rsatadigan biomarkerlarni batafsilroq o‘rganishni rejalashtirmoqda.