Аmbroksol — Yevropada keng qoʼllaniladigan yoʼtalga qarshi dori vositasi — Parkinson kasalligiga chalingan bemorlarda dementsiya rivojlanishini sekinlashtirishi mumkin.

Bu xulosaga Lawson Health Research Institute tadqiqotchilari 55 nafar ishtirokchi ishtirok etgan bir yillik klinik sinov natijalariga koʼra kelishdi. Tadqiqot natijalari JAMA Neurology jurnalida eʼlon qilindi.

Dori vositasi psixik simptomlarni va miyaga zarar yetkazuvchi GFAP markerining darajasini barqarorlashtirdi, genetik xavfi boʼlgan bemorlarda kognitiv funktsiyalar yaxshilandi. Ishtirokchilar ambroksolni har kuni qabul qilishdi va platsebo guruhiga nisbatan ularda dementsiyaning rivojlanishi kuzatilmadi. Bundan tashqari, preparat terapevtik konsentratsiyalarda miyaga yaxshi kirib borgan. Faoliyatining mexanizmi hujayralarni toksik birikmalardan tozalaydigan GFAP fermentini qoʼllab-quvvatlash bilan bogʼliq. Parkinson kasalligi bilan ogʼrigan bemorlarda uning darajasi odatda kamayadi, bu esa miya shikastlanishiga olib keladi. Аmbroksol ushbu fermentning faoliyatini kuchaytiradi, bu esa himoyaviy taʼsirning sababi boʼlishi mumkin.

Tadqiqot mualliflari taʼkidlashicha, mavjud dori vositalari faqat simptomlarni yumshatadi, lekin neyrodegeneratsiya jarayoniga taʼsir qilmaydi. Yangi yondashuv, ayniqsa, yuqori genetik xavf ostida boʼlgan odamlarda kasallikni sekinlashtirishning arzon va qulay usuli boʼlishi mumkin. Yaqin kelajakda jamoa kognitiv funktsiyaga qaratilgan yangi tadqiqot oʼtkazishni rejalashtirmoqda.