Hukumat qarori (784-son, 11.12.2025-y.) bilan “Tadbirkorlik subyektlariga subsidiyalar, imtiyozlar va preferensiyalar taqdim etilishini monitoring qilish, ularning samaradorligini baholash hamda asossiz olingan va maqsadsiz foydalanilgan subsidiyalarni qaytarib olish tartibi toʻgʻrisida”gi nizom tasdiqlandi.

Nizomga koʻra, qoʻllab-quvvatlash choralarini taqdim etishda ularni taqdim etadigan tashkilot tomonidan tadbirkor erishishi lozim boʻlgan aniq maqsadli koʻrsatkichlar belgilanadi.

✅ Tadbirkorga subsidiyalar ajratilishi “subsidiya.mf.uz” platformasi orqali monitoring qilinadi.

Samaradorlikni baholashda manbalardan quyidagi ketma-ketlikda foydalaniladi:

▪️ tadbirkorning moliyaviy, soliq hisobotlari;

▪️ sohaviy idoralar yoki statistika idoralari maʼlumotlari;

▪️ qoʻllab-quvvatlash choralari natijalari yuzasidan tadbirkor tomonidan taqdim etilgan maʼlumotlar.

 Samaradorlik har bir tadbirkor uchun iqtisodiy, moliyaviy (byudjet) va ijtimoiy mezonlar boʻyicha alohida baholanadi.

Tadbirkorga taqdim etilgan subsidiyalar quyidagi hollarda qaytariladi:

- subsidiya shartnomasi (bitim) boʻyicha tadbirkor tomonidan erishish lozim boʻlgan aniq maqsadli koʻrsatkichlar bajarilmaganda;

- mablagʻlardan maqsadsiz va samarasiz foydalanilgani aniqlanganda;

- tadbirkor tomonidan tegishli hujjatlar yoki maʼlumotlarni notoʻgʻri yoxud buzib koʻrsatish va asossiz olingani holatlari aniqlanganda.