Қуёш кўз саломатлигига қандай таъсир қилади
Қуёш ёруғлик беради ва инсон саломатлиги учун зарур - қуёш нурлари таркибида Д витамини мавжуд бўлиб, у суяк ва тиш саломатлиги учун зарур бўлган калсий ва фосфор алмашинувида муҳим рол ўйнайди.
Бироқ, шу билан бирга, ултрабинафша нурланишнинг узоқ муддатли таъсири жиддий касалликларнинг ривожланиш хавфини ошириши мумкин, деб огоҳлантирди офталмология бўлими мудири Шаҳло Маҳкамова.
Аввало, мутахассиснинг сўзларига кўра, ёрқин қуёш кўз учун хавфли. Ултрабинафша нурларнинг ортиқча миқдори кўзни ҳимоя қилувчи кўз ёш пардасини емириши мумкин - бу кўз ёш суюқлиги таркибининг ўзгаришига ва ҳажмининг камайишига олиб келади. Натижада, иссиқ ҳавода қуруқ кўз синдроми деб аталадиган ҳолатни сезиш мумкин.
Бундан ташқари, ултрабинафша нурланиш кўз гавҳари шикастланишининг асосий сабабчиси ҳисобланади, бу эса кейинчалик катарактага олиб келиши мумкин. Ушбу касаллик кўпинча экваторга яқин жойлашган мамлакатларда яшовчи одамларда ёшлигида ривожланиши бежиз эмас. Қуёш инсолятсияси юқори бўлган ҳудудларда яшовчи одамларда тез-тез ташхис қўйиладиган яна бир касаллик птеригиум бўлиб, унда конюнктива дупликатураси кўз шох пардасининг олдинги юзасига ўсиб чиқа бошлайди, бу кўзнинг чангли ҳаво ва ортиқча қуёш нурига ўзига хос ҳимоя реаксиясидир.
Қуёш нурлари таъсирига кўпроқ кўз касалликлари (катаракта, тўр парда дистрофияси, глаукома каби) мавжуд бўлган, шунингдек, меланин даражаси паст бўлган, яъни кулранг, яшил ва кўк кўзлар ва оқ рангли тери эгалари кўпроқ мойил бўлади.
Фаол қуёшдан ҳимояланиш учун шифокор кенг ҳошияли кўзойнак тақиш ва панама кийишни қатъий тавсия қилади.
