Xitoyda dunyodagi birinchi sun’iy intellekt shifoxonasi ochiladi
Pekinning Sinxua universiteti to‘liq sun’iy intellekt bilan ishlaydigan dunyodagi birinchi shifoxonaga asos soldi.
“Agent shifoxonasi” deya nomlangan bu muassasada 14 nafar virtual shifokor va 4 nafar hamshira faoliyat ko‘rsatadi. Bu haqda Medium nashri xabar berdi.
Virtual tibbiyot xodimlari kuniga 3 000 nafargacha bemorga tashxis qo‘yish, davolash va boshqarish imkoniyatiga ega bo‘lishi kutilmoqda. Tizim bir necha kun ichida 10 ming holatni ko‘rib chiqadi — bu shifokorlar ikki yilda bajaradigan ish. Bu, ayniqsa, mutaxassis yetishmaydigan hududlarda as qotadi.
Robot shifokorlar AQSHning tibbiy litsenziyalash imtihonidan 93 foizdan ortiq aniqlik bilan o‘tishga muvaffaq bo‘lishgan. Ular avvalgi tibbiy sun’iy intellekt tizimlaridan farqli o‘laroq, faqatgina tasvirlarni tahlil qilib qolmay, bir nechta sohalarda mutaxassislik xizmatini taklif etadi.
“Bu texnologiya mavjud tibbiy sun’iy intellektdan tubdan farq qiladi. Ular avvalgi tibbiy sun’iy intellekt tizimlaridan farqli o‘laroq, nafaqat tasvirlarni tahlil qiladi, balki bir nechta yo‘nalishda mutaxassislik xizmatini ham taklif etadi”, deydi loyihaning yetakchi tadqiqotchisi doktor Lixua Chjan.
AQSH tibbiy litsenziyalash imtihonidan o‘tkazilganda, virtual shifokorlar 93,06 foiz aniqlik bilan muvaffaqiyat qozongan. Bu ko‘plab mamlakatlar tibbiyot bitiruvchilari uchun o‘rtacha o‘tish darajasidan yuqori.
Bemorlarga g‘amxo‘rlik qilishdan tashqari, bu kasalxona tibbiy ta’lim uchun misli ko‘rilmagan imkoniyatlarni taqdim etadi. Tibbiyot talabalari ushbu virtual muhitda malaka oshirishi mumkin bo‘ladi. Bu ularga haqiqiy bemorlarga hech qanday xavf tug‘dirmasdan sohasida rivojlanishga yordam beradi. Ushbu shifoxona katta texnologik yutuq bo‘lsa-da, hali ommaga taqdim etilganicha yo‘q.
