Pomidorning kutilmagan foydasi aniqlandi
Natto (fermentlangan soya dukkaklari), pomidor va yashil qalampir iste’mol qilish stress darajasini sezilarli darajada kamaytirishi mumkin - ichak mikroflorasiga ta’sir qilishi orqali.
Yaponiyalik tadqiqotchilar "Sukoyaka Health Survey" keng ko‘lamli so‘rovi doirasida mingdan ortiq katta yoshli ishtirokchilarning ma’lumotlarini tahlil qilib, shunday xulosaga kelishdi.
Stress darajasi yuqori bo‘lgan odamlarda foydali Lachnospira bakteriyalari kamroq va NRF9.3 to‘laqonli ovqatlanish indeksi bo‘yicha ko‘rsatkichlari past ekanligi ma’lum bo‘ldi. Shuningdek, bu ishtirokchilar natto, pomidor va yashil qalampirni kamroq iste’mol qilishgani aniqlandi. Aksincha, ushbu mahsulotlarni muntazam ravishda iste’mol qilish mikrofloraning yaxshilanishi va stress ko‘rsatkichlarining pasayishiga sabab bo‘ladi.
Olimlar ovqatlanish sifati, mikrobiota tarkibi va stress darajasini bog‘lash uchun ehtimoliy modellashtirishni qo‘lladilar. Modellar shuni ko‘rsatdiki, ratsion qanchalik xilma-xil va ozuqaviy moddalarga boy bo‘lsa, barqaror psixoemotsional holat bilan bog‘liq bo‘lgan Lachnospira bakteriyasining tarkibi shunchalik yuqori bo‘ladi.
Mualliflarning ta’kidlashicha, gap mo‘jizaviy mahsulotlar haqida emas, balki butun ratsion haqida ketmoqda. Ammo dukkaklilar, pomidor va yashil qalampir stressga qarshi ovqatlanishning muhim qismi bo‘lishi mumkin.
